Synopsis: Will David Matlin, the new athletic director of the University of Hawaii at Manoa, be the savior of the athletics department? ADVERTISING Synopsis: Will David Matlin, the new athletic director of the University of Hawaii at Manoa, be the
Synopsis: Will David Matlin, the new athletic director of the University of Hawaii at Manoa, be the savior of the athletics department?
•••
Welina e nā makamaka heluhelu. Ke lana nei ka manaʻo o ko ʻoukou mea kākau, he kākoʻo ʻoukou i nā hui ʻālapa o ke Kulanui o Hawaiʻi ma Mānoa, nā Koa Ānuenue hoʻi. He nui nō hoʻi nā hui ʻālapa o ke Kulanui o Hawaiʻi ma Mānoa, he ʻehiku hui ʻālapa no nā kāne, he ʻumi kumamālua hui no nā wāhine, a he ʻelua hui no nā kāne i hui pū me nā wāhine.
Ma mua o ke kamaʻilio ʻana no ia pouhana hou o ka Hale ʻĀlapa o ke Kulanui o Hawaiʻi ma Mānoa, he manaʻo ko ʻoukou mea kākau e hōʻike aku i ka mahalo i ke Kulanui o Hawaiʻi ma Mānoa no ka mālama ʻana i nā hana ʻālapa he nui, ʻoiai he mea ia e kākoʻo ai i kekahi poʻe ʻōpiopio i ke komo ʻana i loko o ke kulanui. Inā paha ʻaʻole i loaʻa ia mau hana ʻālapa ma ke kulanui, inā ʻaʻole paha i komo aku kekahi poʻe ʻōpiopio i loko o ke kulanui a puka. No laila, he mea nui nō nā hana ʻālapa ma ke kulanui. A he mea nui nō hoʻi ka luna o ke Keʻena ʻĀlapa. A pēlā pū nō me ke kākoʻo o ko Hawaiʻi a me nā hui ʻoihana like ʻole o Hawaiʻi nei.
ʻAkahi nō a kūkala ʻia aʻe ka luna ʻālapa hou o ke Kulanui o Hawaiʻi ma Mānoa. ʻO David Matlin kona inoa. He koa wiwo ʻole nō paha ʻo ia nei e lele poʻo ana i loko o ke kai hohonu i piha i nā niuhi ʻai holopapa. ʻEā, ʻo Hugh Yoshida paha ka mea hope loa i lōʻihi loa nā makahiki i hana ai ma ke ʻano he luna ʻālapa no ke Kulanui o Hawaiʻi ma Mānoa, he ʻumi makahiki a emi iki mai. ʻO Herman Frazier ka luna ma hope mai o Yoshida, a he ʻeono wale nō ona makahiki i hana ai ma ia kūlana. ʻO Jim Donovan ka luna ma hope o Frazier, a he ʻehā wale nō ona makahiki. ʻO Ben Jay, he ʻelua wale nō makahiki. Ua emi mai nā makahiki o ke kau o kēlā me kēia luna ʻālapa ma hope mai o Yoshida. ʻEhia ana lā makahiki o Matlin e hana ai ma ia kūlana? He hoʻokahi wale nō paha?
He aha ka pilikia? Wahi a Yoshida, i kona wā e hana ana ma ke ʻano he luna ʻālapa no Hawaiʻi, ʻo ka moʻohelu kālā, he 20 miliona kālā. A i kēia manawa, he 30 miliona kālā. ʻAʻole paha i piʻi like me ke kūlana waiwai o Hawaiʻi nei. I ka makahiki 2002, he $1.71 o ke kālani kakalina maoli kēpau ʻole. I ka makahiki 2014, he $4.17 o ke kālani. Ua pālua a ʻoi. Inā paha i piʻi like ka moʻohelu kālā o ke Keʻena ʻĀlapa o nā Ānuenue, inā paha ua pau nā pilikia o ia keʻena.
Ua mākaukau nō ʻo Matlin e lawelawe i ka hana, a he mau manaʻo maikaʻi kona. E kūkākūkā ana ʻo ia me nā haumāna ʻālapa, nā luna kulanui, nā poʻo kaʻi a me nā luna kau kānāwai. A he makemake kona e hoʻoulu i ka hoi o ka lehulehu no nā hana ʻālapa o ke Kulanui o Hawaiʻi ma Mānoa. Ke lana nei ka manaʻo, e holo mua nō ʻo Hawaiʻi ma lalo o Matlin.
Eia mai kekahi manaʻo. E mālama ʻia paha kekahi mau papa ʻālapa ma ke kauwela no nā keiki ma Waiʻanae, ma Waimānalo, ma Maui a ma Molokaʻi paha, ma nā wahi i nui nā keiki Hawaiʻi, a pēlā pū paha me nā keiki ʻano ʻilihune paha. A he mau papa manuahi ia, akā, he mau papa e hoʻoulu ana i ka hoi o ia mau keiki i nā hana ʻālapa, a e hoʻoulu ana paha i ka hoi i ke komo i ke Kulanui o Hawaiʻi ma Mānoa a e pāʻani nō hoʻi i ka pōpō hīnaʻi, ka pōpō paʻipaʻi a me ka pōpō pekupeku paha. A ʻo ka pāʻani ʻana o nā keiki o Hawaiʻi nei, ʻo ia paha kekahi mea e nui ai ke anaina mākaʻikaʻi ma nā hoʻokūkū a e nui ai hoʻi ke kālā o nā Ānuenue.
The weekly Hawaiian language column is coordinated by Kawaihuelani Center for Hawaiian Language at the University of Hawaii.
