Synopsis: The ninth year of Oncology on Canvas in Hawai‘i. The exhibit is currently at Honolulu Hale from May 4-22.
Synopsis: The ninth year of Oncology on Canvas in Hawai‘i. The exhibit is currently at Honolulu Hale from May 4-22.
Welina e nā makamaka heluhelu o Kauakūkalahale. ʻO ia poʻo manaʻo e kau aʻela i luna, ua kamaʻāina paha iā ʻoukou? ʻAkahi nō a ʻike ko ʻoukou mea kākau i ka Lapaʻau ʻIʻo Ulu ma ke Kapolena Pena Kiʻi i kēia makahiki nei, he mau mahina i hala iho nei. He polokalamu maikaʻi nō ia. He polokalamu hoʻi no nā kānaka i loaʻa i ka maʻi ʻaʻai a me ko lākou mau ʻohana a me nā hoa aloha. I wahi ia polokalamu ʻo ka Lapaʻau ʻIʻo Ulu ma ke Kapolena Pena Kiʻi e hōʻike aku ai i ka huakaʻi ponoʻī o ka poʻe i loʻohia i ka maʻi ʻaʻai a me ko lākou ʻohana a hoa paha ma o ka hana ʻana i ka hana noʻeau, ma ke pena kiʻi hoʻi. ʻAʻole naʻe i Hawaiʻi nei i hoʻokumu mua ʻia ai nei polokalamu. I ʻAmelika i hoʻokumu ʻia ai i ka makahiki 2004. He hoʻokūkū hana noʻeau naʻe ia. I mea ia e haʻi aku ai ke kanaka i loaʻa i ia maʻi a i loaʻa paha kona ʻohana a hoa paha i ia maʻi, i kona moʻolelo ma o ka hana noʻeau. E nānā aku paha i nā kiʻi ma lillyoncology.com.
I ka makahiki 2005, hele akula kekahi mau kahu maʻi o ka ʻAhahui Kahu Maʻi Lapaʻau ʻIʻo Ulu o Hawaiʻi i ʻAmelika no kahi ʻaha a ma laila lākou i aʻo mai ai no ka polokalamu ʻo ka Lapaʻau ʻIʻo Ulu ma ke Kapolena Pena Kiʻi. A ulu aʻela ka makemake i loko o lākou e mālama ʻia ua polokalamu nei i Hawaiʻi nei. A i ka makahiki 2007, ua hoʻokō ʻia ka makemake. ʻO ka makamua ia o ka mālama ʻia ʻana iho o ia polokalamu ma Hawaiʻi nei. A he 100 mau kānaka a ʻoi i komo i loko. ʻO kēia makahiki nei, ʻo ia ka iwa o ka makahiki o ka mālama ʻia ʻana o nei polokalamu ma Hawaiʻi. A he 400 mau kānaka a ʻoi i komo i loko mai kekahi mau haukapila ʻehā, ʻo ka Haukapila ʻo ka Mōʻīwahine, ʻo ka Haukapila ʻo Kapiʻolani, ʻo ka Haukapila ʻo Kaiser a me ka Haukapila ʻo Tripler. A he ʻekolu haneli mau kiʻi e kau aʻela ma Honolulu Hale.
He keu aku ia polokalamu a ka maikaʻi, ʻoiai, he mea hoʻopūhili noʻonoʻo ka loaʻa ʻana i ka maʻi ʻaʻai, a he hana nui ka hōʻike ʻana i nā mea ma ka naʻau ma o nā hua ʻōlelo. A ʻo ka hana noʻeau, he mea hōʻolu naʻau ia no kekahi poʻe.
ʻAkahi nō a hemo ka hōʻikeʻike ʻo Ka Lapaʻau ʻIʻo Ulu Ma Ke Kapolena Pena Kiʻi i ka pule nei i hala, i ka lā ʻehā hoʻi o ka mahina ʻo Mei. A ma laila nō ka hōʻikeʻike a hiki i ka lā 22 o kēia mahina nei. Ke ʻole e kuhihewa ko ʻoukou mea kākau, ʻo ka Lapaʻau ʻIʻo Ulu ma ke Kapolena Pena Kiʻi ma Hawaiʻi nei, ʻaʻole ia he hoʻokūkū. Akā, he nui nā kiʻi nani wale, a hohonu nō ka ʻike ke heluhelu i kahi paukū e wehewehe ana i ke kiʻi. Inā he manawa kaʻawale paha ko ʻoukou, e naue aku i Honolulu Hale no ka mākaʻikaʻi ʻana aku i nā kiʻi. A e komo aku paha i ka hana i kēia makahiki aʻe.
Ua komo aku nei ko ʻoukou mea kākau me kekahi o kona ʻohana a aia nō ke kau aʻela ia mau kiʻi.
Kū Kiaʻi Mauna. I nehinei, ua kū i mua o ka ʻaha hoʻokolokolo ka hapanui o nā Kū Kiaʻi Mauna i hopu hewa ʻia i ka lā ʻelua o ka mahina ʻo ʻApelila ma Mauna Kea. Wahi a ka lohe, ua hana ʻino ʻia aku lākou. E hoʻouna aku i ke aloha, nā manaʻo maikaʻi, a me nā pule no ka pono o lākou ala, nā Kū Kiaʻi Mauna a me Mauna Kea. Aloha ʻĀina.
The weekly Hawaiian language column is coordinated by Kawaihuelani Center for Hawaiian Language at the University of Hawaii.