Synopsis: The “TMT on Maunakea: Common Ground” series of presentations began this past Tuesday, May 19. There will be three more dates, May 27 at Kula‘imano Community Center, in Pepeekeo, and June 2 and 9 at the Laupahoehoe Community Public Charter School cafeteria. They are from 6:30-9 p.m.
Synopsis: The “TMT on Maunakea: Common Ground” series of presentations began this past Tuesday, May 19. There will be three more dates, May 27 at Kula‘imano Community Center, in Pepeekeo, and June 2 and 9 at the Laupahoehoe Community Public Charter School cafeteria. They are from 6:30-9 p.m.
•••
Welina e nā makamaka heluhelu o Kauakūkalahale. Ua lohe iho nei paha ʻoukou no kahi mau haʻi ʻōlelo e mālama ʻia ana i kēia mahina nei a me ka mahina ʻo Iune. Ua kapa ʻia iho ia mau haʻi ʻōlelo, ʻo ka ʻOhe Nānā Kanakolu Mika ma Mauna Kea: ka Honua Like. Na ka Hui Hoʻomohala Kaiāulu o Hilo me Hāmākua i kākoʻo a i mālama hoʻi. A ʻo ka Pōʻalua nei ka lā mua i mālama ʻia ai kekahi o ia mau haʻi ʻōlelo. A he mea maikaʻi paha ʻoiai, he ʻekolu mau kānaka haʻi ʻōlelo, e hōʻike ana i nā ʻaoʻao like ʻole. Ma ka ʻaoʻao o ke Keʻena o ka Hoʻoponopono Hana ma Mauna Kea, ʻo Stephanie Nagata. Ma ka ʻaoʻao ʻepekema, ʻo Paul Coleman. A ma ka ʻaoʻao ʻike a hana Hawaiʻi ʻo Lanakila Mangauil. E hui kala mai i ko ʻoukou mea kākau, ʻakahi nō a ʻike ʻia kēia, a no laila, ua lawa wale nō ka manawa e nānā ai i kahi hapa o ka haʻi ʻōlelo a Lanakila Mangauil, a he keu aku ia a ka maikaʻi. Ua ahuwale kona akamai a naʻauao. Inā ʻaʻole ʻoukou i naue aku i nā haʻi ʻōlelo o ka Pōʻalua nei, a ʻaʻole paha hiki iā ʻoukou ke hele aku i nā haʻi ʻōlelo, e hele aku ma ka pūnaewele ma ke kahua www.bigislandvideonews.com/tag/common-ground-tmt-series/.
I kēia Pōʻakolu, ka lā 27, e mālama ʻia ana nā haʻi ʻōlelo i ke Kikowaena Kaiāulu o Kulaʻimano ma Pepeʻekeo. He ʻekolu mau haʻi ʻōlelo, ʻo Paul Neves, ʻo Sandra Dawson a me Peter Adler.
I ka lā 2 o Iune, i ka Hale ʻAina o ke Kula Hōʻāmana o Laupāhoehoe. He ʻekolu mau haʻi ʻōlelo hou, ʻo Hualalai Keohuloa, ʻo Wallace Ishibashi a me Paul Brewbaker. A i ka lā 9 o Iune, ma kahi like, he ʻehā mau haʻi ʻōlelo hou, ʻo Richard Ha, ʻo Art Kimura, ʻo Jesse Eiben a me Doug Simons. Hoʻomaka nā haʻi ʻōlelo a pau i ka hola 6:30 o ke ahiahi a pau i ka hola 9:00.
Kū Kiaʻi Mauna. E mālama ʻia ana kahi ʻaha mele i ka lā 23 o ka mahina ʻo Mei, ʻo Kapu System lāua ʻo D.R.A.S nā hui hīmeni. Ma Hawaiian Brians, Oʻahu ana e mālama ʻia ai. E hoʻomaka ana i ka hola 9:00 o ke ahiahi. He ʻelima kālā e komo ai, a he pono ke piha nā makahiki he 18 i ke kanaka a ʻoi aku. ʻO nā pōmaikaʻi e loaʻa mai ana, e lilo ana no ka pono o Mauna Kea.
We Are KAHEA. He hoʻoulu kālā kēia a he mea hoʻoheno iā Mauna Kea. E mālama ʻia aku ana i ka lā 4 o ka mahina ʻo Iune, mai ka hola 5:00 o ka ʻauinalā a i ka hola 8:00. ʻO kahi kāki komo, he kālā hāʻawi manawaleʻa wale nō ma ka ʻīpuka, a he $15 ke kāki i ʻupu ʻia, akā, nāu nō e koho i ka nui. Aia ana ka hoʻokani pila ʻana, ka mele ʻana, ka mea inu a me ka pūpū. E nānā aku ma HIFINEST.COM no kekahi ʻike hou aku.
ʻAha Mele Aloha ʻĀina. E mālama ʻia ana kēia ʻaha mele i ka lā 27 o ka mahine ʻo Iune, he Pōʻaono. E hemo ana ka ʻīpuka i ka hola 4:00 o ka ʻauinalā, a e hoʻomaka ana ka honehone ʻana o nā leo mele i ka hola 5:00. ʻO ke kikiki emi loa, he $20, a ʻo ke kikiki pipiʻi loa, he $55. He nui ana nā puʻukani, ʻo Henry Kapono, ʻo Brother Noland, ʻo John Cruz, ʻo Mark Kealii Hoomalu, ʻo Weldon Kekauoha, ʻo Amy Hanaialii, ʻo Hapa, ʻo Fiji, ʻo Maoli, ʻo Manaʻo Co., ʻo Paula Funga, ʻo Kaumakaiwa, ʻo Shawn Pimental, a me Sudden Rush. ʻO ka lā mua kēia o ke kūʻai ʻia ʻana o nā kikiki.
The weekly Hawaiian language column is coordinated by Kawaihuelani Center for Hawaiian Language at the University of Hawaii.