Synopsis: Some dangerous hiking trails should be closed and violators should be fined and required to pay for any rescue costs.
Synopsis: Some dangerous hiking trails should be closed and violators should be fined and required to pay for any rescue costs.
•••
ʻO kekahi hana punahele a ka lehulehu i kēia mau lā ka piʻi mauna ʻana. I kēlā me kēia lā, nui nā kānaka ma ke ala piʻi mauna. Malia paha, ʻo ke kumu o ka piʻi mauna ʻana, ʻo ia nā kiʻi nani a nā kānaka piʻi mauna o ka paʻi ʻana. Nui hoʻi nā kiʻi e hōʻike ana i nā kānaka i ka piʻi mauna ʻana. Aia nō ma Facebook mā lāua ʻo Instagram. Ua nīnau aku au i koʻu mau hoaaloha, “Makaʻu loa ke ala piʻi mauna a ʻoukou e piʻi ai?” A pane maila lākou, “ʻAe, inā hāʻule, e make ana paha.” Ua pūʻiwa au i ka lohe aku. Inā pēlā, he aha maila kā lākou o ka ʻaʻa ʻana i ka piʻi?! Ua kapu kekahi mau ala ʻaʻole e piʻi ʻia e ka lehulehu, e laʻa ʻo Sacred Falls, Stairway to Heaven, a me Deadman’s Catwalk akā naʻe, nui nā kānaka hoʻokuli i ia ʻōlelo aʻoaʻo a e noke aku nō i ka piʻi ma ia mau ala. ʻO ka nui o nā kānaka e hōʻaʻano nei i ka piʻi mauna i kēia mau lā, ua hele hoʻi a nui ka hana a ka ʻoihana kīnai ahi i ka hoʻopakele mau ʻana i nā mea kūpilikiʻi.
I lawa nō a laha mai ka nūhou ma ke kīwī e pili ana i kekahi kanaka i hele a pilikia loa i ka piʻi mauna ʻana i ka pō, ulupuni ihola koʻu noʻonoʻo i ka hoka. I koʻu manaʻo, aia ka pono o ka piʻi mauna ʻana a hana ʻia i ka lā ʻokoʻa. He nui naʻe ka poʻe nāna e piʻi i ka pō, a ʻo ko lākou hoʻopakele ʻia ka hopena. I kekahi manawa, aia ia kanaka kūpilikiʻi ma kahi kūnihi loa o ke kuahiwi, a ke hōʻea aku ka poʻe kīnai ahi ma laila, ʻo lākou pū ke komo i ia kūlana like. A i ka wā e hoʻopakele ʻia ai kēlā mea piʻi mauna, hapa mai ka nui o nā kānaka kīnai ahi e koe nei no ka mālama ʻana i nā ulia ʻē aʻe ke kupu mai. Maliʻa o pilikia kekahi kanaka piʻi mauna i ia wā like e pilikia ai kekahi kanaka i ka maʻi kauhola. Ua kaupalena ʻia ka nui o nā hui kānaka kīnai ahi a me nā kalaka e pono ai. Ke paʻahana kekahi hui, e kali ana paha kekahi o ia mau mea pilikia a kaʻawale ia hui, a i ʻole ia, e kali ana a kaʻawale kekahi hui kānaka kīnai ahi ʻokoʻa. Eia naʻe ka mea ʻāpiki, he mea ʻē ka pipiʻi o hoʻokahi hoʻouna ʻana i nā kalaka a me nā limahana. Oki loa hoʻi ke kumukūʻai o ke kakalina e pono ai ka holo ʻana o nā kalaka a me ka lele ʻana paha o ka helikopa.
No laila, i aha auaneʻi ka hana a ke aupuni e pau ai kēia ʻano hihia? Aia i hea ka pono o ka uku ʻana no ka hoʻopakele aku i kekahi kanaka palaleha o ka hana? I koʻu manaʻo, inā aia kekahi kanaka ua komo hewa ma ke ala i pāpā ʻia kona hele ʻia, na ia kanaka nō e uku i nā kāki a pau e pili ana i kona hoʻopakele ʻia ʻana. ʻO ia paha ka mea e emi ai ka ʻaʻa nui ʻana o nā kānaka i ka piʻi mauna ma kahi kūpono ʻole, ma kahi hoʻi e pilikia ai a e pono ai kona hoʻopakele ʻia ʻana. Eia aʻe ke kauwela ke hiki mai nei, a hiki pū mai ma ka poʻe piʻi mauna. Maikaʻi ke kau koke ʻia ʻana o kekahi kānāwai e hoʻopaʻi ana i nā kānaka piʻi hewa i nā alahele kapu. ʻAʻole e hihi, e mau ana ka hana a ka poʻe kīnai ahi.
The weekly Hawaiian language column is coordinated by Kawaihuelani Center for Hawaiian Language at the University of Hawaii.