Synopsis: State officials need to fulfill the state motto, or change it.
Synopsis: State officials need to fulfill the state motto, or change it.
Welina e nā makamaka heluhelu, ʻo ia ʻōlelo e kau aʻela i luna i poʻo manaʻo i kēia lā, he ʻōlelo kamaʻāina nō ia, he ʻōlelo ia na Kauikeaouli, a hoʻolilo ʻia ihola ʻo ia ka mākia o ka mokuʻāina ʻo Hawaiʻi. ʻO ka mea ʻāpiki, ʻaʻole hana nā luna aupuni i mea e kō ai ua ʻōlelo mākia nei. A loaʻa mai nei i ko ʻoukou mea kākau kahi ʻōlelo no ka hoʻokō ʻole ʻia o ia ʻōlelo ma ka nūpepa Ka Lahui Hawaii. A penei ia:
Ua oleloia “Ua mau ke ea o ka aina i ka pono.” He mea oiaio anei keia olelo? A i ole ia, he olelo hookaulana wale no anei no ka lealea olelo? Ina e haawi ana kakou i ka ae i keia ninau hope, alaila, he mea lapuwale ko kakou puana mau i kela hopuna-olelo kaulana; he keleawe hookanikani wale iho no; he walaau lapuwale. A ke hoike mai nei na hua i kakau ia maluna o ko kakou hale aupuni a ma na wahi e ae i ko kakou ano hookamani lua ole. Ina aole i “mau ke ea o ka aina i ka pono,” alaila, e wehe koke ae kakou ia mau huaolelo, a e pani iho ma kona hakahaka i ka mea kupono. Heaha ka olelo kupono? “Ua mau ke ea o ka aina i ka Hewa.”—Oia anei? Ke manao nei makou aole pela.
Aka, ina e haawi kakou i ka ae i ka ninau mua, penei: ae, he oiaio, “Ua mau ke ea o ka aina i ka Pono,” alaila, e hooikaika kakou i ka Pono a lanakila ia, no ka mea, o ka mea i makemake nui ia, oia ka mau o ke ea o ka aina. Aohe mea i oi ae i mua o keia.
ʻEā, ʻaʻole paha maikaʻi ka wehe ʻana i ka hua ʻōlelo pono. He mea nui ia. No laila, e ʻaelike kākou, he ʻoiaʻiʻo ka mākia e kū nei, a e hana i ka mea e mau ai ke ea o ka ʻāina. Aia nō nā kiaʻi o Mauna Kea ke hōʻike aku nei i ka hana kūpono. No laila, e kūpaʻa kākou ma hope o ka ʻāina. I ola ʻo Mauna Kea i nā kānaka e kū kiaʻi ana. E mau ke ea o ka ʻāina i ka pono.
ʻAha Mele Aloha ʻĀina. Aia nō kēia ʻaha mele i kēia ahiahi. E nui ana nā puʻukani kaulana o ka ʻāina, ʻo ia hoʻi ʻo Henry Kapono, ʻo Brother Noland, ʻo John Cruz, ʻo Mark Kealii Hoomalu, ʻo Weldon Kekauoha, ʻo Amy Hanaialii, ʻo Hapa, ʻo Fiji, ʻo Maoli, ʻo Manaʻo Company, ʻo Paula Funga, ʻo Kaumakaiwa, ʻo Shawn Pimental, a me Sudden Rush. E hoʻomaka ana ka honehone ʻana o nā leo mele i ka hola 5:00. ʻO ke kikiki emi loa, he $20, a ʻo ke kikiki pipiʻi loa, he $55. ʻO nā pōmaikaʻi e loaʻa ana, e lilo ana no ka pono o Mauna Kea a me nā wahi laʻa ʻē aʻe.
•••
Ka Hoʻokūkū Mele A Moʻolelo. Mai nō a poina i ka Hoʻokūkū Mele A Moʻolelo. E hiki koke mai ana ka lā kau palena, ʻo ia hoʻi ka Lā Hoʻihoʻi Ea, ka lā 31 hoʻi o Iulai. No laila, e hoʻokaʻawale paha i manawa e haku ai i mele no kou mea aloha, a e kākau ai paha i moʻolelo, a e waiho aku ma www.hawaiianliterature.com. Aia i laila ka palapala e hoʻopihapiha ai. A he wahi makana nō e lilo ana i ka lanakila o ka māhele haku mele a me ka māhele kākau moʻolelo, he $500. ʻEā, he mele hou paha kou a he moʻolelo paha no ka hana ma Mauna Kea. E hoʻokomo ʻia.
The weekly Hawaiian language column is coordinated by Kawaihuelani Center for Hawaiian Language at the University of Hawaii.