Synopsis: The plastic bag reduction ordinance on O‘ahu is a disgrace. There are certain types of products that are exempt from that law, namely, bags used to protect or transport prepared foods, beverages, or bakery goods. And that is just the beginning.
Welina e nā makamaka heluhelu o Kauakūkalahale, ʻo ia ʻōlelo e kau aʻela i luna, pēlā ihola nō ke kuhi a ko ʻoukou mea kākau ma mua, akā, ua launa aku nei me ke aliʻi nui o Oʻahu, me Kākuhihewa, ʻo ia hoʻi, he kuhi hewa ia manaʻo. ʻAʻole ka best ʻo Oʻahu. ʻAʻole loa. I ka lā mua iho nei o ka mahina ʻo Iulai, ʻo ia ka lā mua o ke kānāwai hoʻēmi ʻeke ʻūlina ma Oʻahu nei. ʻO ka mea ʻāpiki, he hiki nō i kekahi mau wahi ke hoʻohana aku i ke ʻeke ʻūlina. I kekahi pule i hala aku nei, i ka wā i kipa mai ai nā hoa aloha ʻo Keʻolohaka lāua ʻo Hanalē, hele aku nei ko ʻoukou mea kākau i ka hale ʻaina, kauoha ihola i ka mea ʻai no ka hoʻihoʻi ʻana aku i ke keʻena a ma laila e hoʻonuʻu aku ai a ʻeha iho ʻo Keʻolohaka mā iā Keoni Pulu. Kali ihola ko ʻoukou mea kākau, ʻo ka loaʻa mai o ke pā mea ʻai. A i ka hāʻawi ʻia ʻana mai o ia pā mea ʻai, aia nō i loko o kahi ʻeke ʻūlina. Pūʻiwa ihola ka noʻonoʻo. Akā, lohe ʻia akula ka nīnau a kekahi kanaka no ke kānāwai hou, a ʻo ka pane a ka limahana, ʻaʻole nō i pili kahi kānāwai i nā hale ʻaina.
ʻAʻole i lohe ʻia kēia pilikia ma nā mokupuni ʻē aʻe o kēia pae ʻāina, kahi i pāpā ʻē ʻia ai ke ʻeke ʻūlina, he ʻehā makahiki a emi iho paha ma mua o ko Oʻahu a Kākuhihewa. No laila, ʻimi ʻia aku nei ua kānāwai nei a loaʻa. ʻO ke kānāwai ma Oʻahu nei, ʻōlelo ʻia, inā he ʻeke ʻūlina ia e halihali ai i ka mea ʻai i hoʻomākaukau ʻia, ka mea inu a me nā mea i puhi ʻia paha, ʻaʻole ia e helu æia me ke ʻano ʻeke i pāpā ʻia. ʻAʻole pēlā ke kānāwai o nā mokupuni ʻē aʻe.
A ʻo kekahi pilikia ma Oʻahu nei, i ka hiki ʻana mai o ia lā mua o ka hoʻēmi ʻeke ʻūlina, hoʻomaka ihola kekahi mau hale kūʻai i ka hāʻawi ʻana aku i ʻeke ʻūlina i ʻoi aku kona mānoanoa, ʻo ia hoʻi, he .00225 ʻīniha, e like me ka ʻōlelo ma ke kānāwai. Pēlā ka mānoanoa o ke ʻeke hoʻohana hou ʻia ma Kauaʻi, akā, ʻaʻole i lohe ʻia ka hana ʻana e like me ko Oʻahu. Ma Hawaiʻi a me Maui, he .003 ʻīniha ka mānoanoa e pono ai. ʻO ko Oʻahu wale nō ke aloha ʻole i ka ʻāina? Pehea ʻoukou e nā luna kau kānāwai o Oʻahu nei?
Ka Hoʻokūkū Mele A Moʻolelo. ʻAuhea ʻoukou, e nā kānaka haku mele a kākau moʻolelo paha, mai nō a poina i ka Hoʻokūkū Mele A Moʻolelo. He ʻumi kumamākolu wale nō lā i koe, a hiki aku i ka lā kau palena.
He pono ke waiho i ke mele a i ka moʻolelo paha i ka Lā Hoʻihoʻi Ea, ka lā 31 hoʻi o Iulai.
No laila, e hoʻokaʻawale paha i manawa e haku ai i mele no kou mea aloha, a e kākau ai paha i moʻolelo, a e lilo paha ʻo Mauna Kea a me nā Kū Kiaʻi Mauna paha i mea e hoʻohenoheno ai ma ke mele a ma ka moʻolelo paha. E waiho aku ma www.hawaiianliterature.com. Aia i laila ka palapala e hoʻopihapiha ai. A he wahi makana nō e lilo ana i ka lanakila o ka māhele haku mele a me ka māhele kākau moʻolelo, he $500.
The weekly Hawaiian language column is coordinated by Kawaihuelani Center for Hawaiian Language at the University of Hawaii.
