Synopsis: Prognoses of the weather are all over the news, but do they actually benefit the public? ADVERTISING Synopsis: Prognoses of the weather are all over the news, but do they actually benefit the public? ••• Aloha mai nō e
Synopsis: Prognoses of the weather are all over the news, but do they actually benefit the public?
•••
Aloha mai nō e nā makamaka e hoʻoheno nei i ka ʻōlelo Hawaiʻi. E kala loa ko kākou hui ʻana ma loko o ke kino o Kauakūkalahale. Eia mai naʻe au ua ʻōʻili hou mai i mua o ke ākea me ka halihali mai i kahi pūʻolo no kākou e nūnēnūnē ai, ʻo ia hoʻi, he aha ka waiwai o ke kilo makani pāhili inā ʻo ka hūhewa ka mea maʻa mau?
Ua hele a he mea pinepine ke kani ʻana o ke oeoe e hahaʻi mai ana i ka lono no kahi pōpilikia e hiki mai ana, a i koʻu hoʻomaopopo ʻana, he kākaʻikahi wale nō nā manawa i hili ʻia mai ai ko kākou mau kapakai e ka makani pāhili. Hoʻomaopopo aʻela au i kahi makani i kapa ʻia ʻo ʻIwa. I ia mau lā, ʻaʻole au i lohe i ke kūkala ʻana no kona hao ʻana mai. Aia māua ʻo koʻu hoa ma kahi o Iwilei i ka ʻoki kumulāʻau. ʻO ia kā māua ʻoihana i ia mau lā. Nui a ikaika ka makani e hao mai ana a hana nui hoʻi ke kopekope ʻana i nā lau a me nā laʻalāʻau no ka mea, aia ke halihali ʻia ala e nā kīkīao makani.
Ua pōmaikaʻi nō māua a ua pakele i ka ʻino. Nui nō naʻe ka pōʻino i ili mai ma luna o nēia paeʻāina, a ʻo Kauaʻi ka mea i pilikia loa. Ma ia hope mai, ua ʻiniki hou ʻia mai kākou e kekahi makani pāhili i kapa ʻia ʻo ʻIniki, a nui ka pōpilikia i kipa hou aku iā Kauaʻi. Aloha nō ia wahi mokupuni. Ma loko o nā makahiki o ia hope mai, he mau makani ʻino hou aku i pā mai i ka ʻāina. ʻAʻole naʻe i like ka nui o ka pōʻino.
Ua maopopo iā kākou ka ikaika o ia ʻano makani a me ka pōʻino ke pae mai i ka ʻāina. Eia naʻe, ʻaʻole paha he kōkua ke kūkala pinepine ʻana mai i nā wā a pau e ʻike ʻia ai kona ulu ʻana ma kahi mamao o ka Pākīpika. No ka mea, ke hana ʻia mai pēlā, he kohu haunaele ana ka mūia mai o nā kānaka i nā halekūʻai. Pau nā iho a me nā kukui paʻa lima i ke kūʻai lilo. Pau pū hoʻi me ka wai, ka leki, ka pepa hāleu, a me nā mea like he nui aku nō. Hoʻonāukiuki ʻiʻo nō ia hopena a ʻaʻole paha hiki ke ʻalo ʻia. ʻAʻole naʻe e hihi. Aia kekahi mea e hoʻomaopopo ai. No ka nui o ka holo pīʻōʻō ʻana i nā manawa a pau, hele a hoʻomaloka ka noʻonoʻo o ka lehulehu no ia mea he makani pāhili, a pau hoʻi ko kākou makaʻala ʻana.
Hoʻomaopopo aʻela au i kekahi mau moʻolelo kamaliʻi. I ka pā ʻana mai o ke poʻo o kahi moa liʻiliʻi i ka hua i hāʻule mai luna mai o ke kumu ʻoka, kuhihewa ʻo ia e hāʻule ana ka lewa. ʻO kona kūkala akula nō ia i ʻō i ʻaneʻi o ka ʻāina. Nui hoʻi nā holoholona i puni i kāna ʻōlelo. ʻO ka nēnē, ka moa kāne, ke kakā, ka pelehū, a pau pū nō hoʻi me ke alopeka. Hahai akula lākou iā ia ma kona huakaʻi e hōʻike ai i ke aliʻi. ʻO ka hopena o ia moa keiki, ua pau i ka ʻai ʻia e ke alopeka. Aloha nō! Ma kekahi moʻolelo, aia kahi keiki kahuhipa e kūkala mau ana no ka hōʻea mai o ka ʻīliohae. ʻAʻole kēia he kuhihewa. He hoʻopunipuni naʻe kāna hana ʻana pēlā, a maopopo iā kākou kona hopena i ka wā i hiki maoli mai ai ka ʻīliohae. Eia mai ka haʻawina. E akahele nō kākou. He wā nō e hiki maoli mai ai ka ʻino.
The weekly Hawaiian language column is coordinated by Kawaihuelani Center for Hawaiian Language at the University of Hawaii.
