Synopsis: Instead of having a single carpool lane, there should be a single lane set aside as mandatory for low occupancy vehicles. That would encourage people to use the rail. ADVERTISING Synopsis: Instead of having a single carpool lane, there
Synopsis: Instead of having a single carpool lane, there should be a single lane set aside as mandatory for low occupancy vehicles. That would encourage people to use the rail.
• • •
Aloha mai nō kākou e nā hoa ʻalo like i ka ʻīnea, ʻo ia hoʻi, ka poʻe e hoʻomanawanui ana i nā kaʻa he nui a lehulehu e kolo ana ma ke alaloa i kēlā me kēia kakahiaka, a pēia pū hoʻi me nā ahiahi. ʻO ka paʻapū loa o ke ala, he holo pupū ka hana. Aloha nō ka poʻe i pōkole ka naʻau. ʻAʻohe ala e pakele ai.
ʻO ua pilikia nei i hōʻike ʻia aʻela, ua ʻike ʻia kona hoʻolawehala ʻana i loko o nā makahiki he nui i kaʻahope aku nei. ʻO ia nō ke kumu i hoʻokumu ʻia ai kēia mea ‘o ke alahao kau i ka lewa. Ke manaʻo ʻia nei ʻo ia ana ka mea e emi ai ka nui o nā kaʻa a hemo ai hoʻi ke paniwai e paʻa nei nā mea kalaiwa o kēlā lā kēia lā. No kēia wā naʻe, a no nā makahiki mai ka wā i hoʻomaka ʻia ai ka hana, ua māhuahua mai ka nui o nā kaʻa a ʻo ia mau holo pupū nō. ʻAʻohe wahi pono a loaʻa mai. Maliʻa o kahe hou mai nā kaʻa ke paʻa ke alahao kau lewa a holo pinepine nā kaʻauila mai lalo mai o ʻEwa. Koe aku ia.
Nui ka poe hoʻomaloka e kānālua nei i ka waiwai o kēia ala hou, a nui hoʻi nā ʻīnea a lākou e ʻike nei i kēia wā o ua ala nei o ke kūkulu ʻia ʻana. ʻO ka heluna o ke kālā a kākou e uku nei, kohu mea lā, ʻaʻohe wā e pau ai kona piʻi ʻana. Eia hou, he makehewa ia no nā hoa makaʻāinana e noho nei ma nā ʻaoʻao Koʻolau a Maunalua paha. Ke uku nei e uku ai. ʻO ke kumu nui e kūʻē nei ua poʻe hoʻomaloka nei, penei hoʻi, ke paʻa mai ke alahao i ke kūkulu ʻia a hoʻomaka mai nā kaʻauila i ka holo aku holo mai i kēlā me kēia lā, ʻaʻole e emi nā kaʻa o ke alaloa, a no ka mea, ua maʻa loa ka poʻe o Oʻahu nei i ka holo lanakila ʻana ma ʻō a ma ʻaneʻi ma luna o ko lākou kaʻa ponoʻī, a he kākaʻikahi wale nō ka poʻe e waiho wale ana i ko lākou kaʻa i ka hale kaʻa.
No laila, pehea e pono ai? ʻO ka nui o nā kālā i lilo ʻē i kēia papahana, ʻaʻole paha e hiki ke kāpae ʻia i kēia manawa. Eia mai naʻe kahi manaʻo. ʻOiai ua maʻa ka poʻe nāna e kalaiwa i ke alaloa i ka hoʻokaʻawale ʻia o hoʻokahi ala no nā kaʻa e kau ʻia ana e nā kānaka he ʻelua a ʻoi, ʻaʻole paha e pilikia ka hoʻonui ʻana i nā ala no nā kaʻa halihali nui i nā ʻōhua. Hiki ke waiho ʻia hoʻokahi ala no ka poʻe kau hoʻokahi ma luna o ko lākou kaʻa ponoʻī. He wā nō e uē ai ka maka a ʻuīʻuī ai ka niho, ʻaʻole nō naʻe a he wā, ʻikea ka waiwai o ke kau ʻana ma luna o ke alahao kau lewa. Na kēlā me kēia ʻohana e hoʻolālā i nā wahi a lākou e hele ai i kekahi lā, a ʻo ia ihola nō ka mea e pono ai.
Inā pēlā mai ka hana, e hapa mai ana nō ka nui o nā kaʻa. ʻO ka poʻe o Koʻolau mā me Maunalua, ke kalaiwa lākou, ua hapa mai ka nui o nā kaʻa ma nā alanui o ke kūlanakauhale. ʻO ia ka pōmaikaʻi e ili mai ana i luna o lākou no kā lākou uku ʻana i ka ʻauhau e hoʻolako ai i nā waihona kālā e hoʻohana ʻia nei no ke kūkulu alahao.
The weekly Hawaiian language column is coordinated by Kawaihuelani Center for Hawaiian Language at the University of Hawaii.
