Ka hāuli o ka mea hewa ʻole, he nalowale koke

Synopsis: Is State Representative Tom Brower telling the full story? Does he really want to work with the people living on the sidewalk near the Children’s Discovery Center in Kaka‘ako to find solutions?

•••

Ua lilo hou ka Lunamakaʻāinana Tom Brower i mea kamaʻilio nui ʻia i ka pule i hala iho nei. I ka Pōʻakahi nei, ua pāluku aku nei kekahi mau ʻōpio i ua luna makaʻāinana lā a wahi āna, ʻaʻole ʻo ia i hoʻoukiuki iki i ia mau ʻōpio, a pāluku wale aku iā ia. ʻO ka Tom Brower kēia nāna i hahau wale aku i ke kaʻa pahu a ke kanaka kuewa i ka hāmale kuʻi hao i ka makahiki 2013. Ua ʻōlelo ʻo Brower, inā he mau mea ko ke kaʻa pahu, unuhi ʻia aʻela nā mea a pau me ka ʻoluʻolu a waiho akula ma kahi kokoke i loaʻa ai ia kaʻa pahu, a laila, hahau wale ʻia akula. ʻEā, ʻaʻole ʻo ia i noi ʻia e ka mākaʻi e hana pēlā, ua hana wale aku ʻo ia e like me kona makemake.

Pehea, ʻaʻole paha ʻo ia i hoʻoukiuki iki i ia mau ʻōpio? ʻO ka Tom Brower kēia nāna i hele aku i ke kanaka e hiamoe ana ma kahi kau kaʻa ʻōhua a haʻi akula iā ia, “Get your ass moving.” ʻAʻole ʻo ia i ʻōlelo me ka ʻoluʻolu, “E ia nei, e ala mai, ua pāpā ʻia, ʻaʻole e hiamoe ma kahi kau kaʻa ʻōhua.” ʻAʻole ʻo ia i ʻōlelo pēlā. “E hele aku pēlā” (Get your ass moving), ʻo ia kāna ʻōlelo.

A i kēia manawa, ua kūpaʻa ʻo Brower, ʻaʻole ʻo ia i hoʻoukiuki iki i ia mau ʻōpio. ʻAʻole paha e piliwi ʻia. Ma ka Hōkū Avalataisa o ka lā 2 iho nei o kēia mahina nei, ua ʻōlelo hoʻopaʻa ihola ʻo Brower, e hoʻomau ʻo ia i ke kamaʻilio ʻana me ka poʻe kuewa e noho ana ma kahi o ke Kikowaena Kamaliʻi, kahi hoʻi i pāluku ʻia ai ʻo ia. A wahi a Brower, inā e mau ana ka noho ʻana o nā kānaka ma laila, he manaʻo kona e hālāwai me ia mau kānaka no ka hana e pono ai. Ke lana nei ka manaʻo, he ʻoiaʻiʻo ia ʻōlelo a Brower no kāna hana like ʻana me ia mau kānaka. ʻO ka mea ʻāpiki, ʻaʻole pēlā kāna hana mai kinohi. He hana kūpono ʻole kāna ma mua, ʻaʻole i kū iki i kona kūlana lunamakaʻāinana. He hahau kāna i ke kaʻa pahu a ke kanaka kuewa, he haʻi aku i ke kanaka hiamoe, “E hele aku pēlā,” a i ka Pōʻakahi nei, he paʻi kiʻi wale aku kāna i kahi o ia mau kānaka kuewa e noho ana. I ua lā nei, ua hiki nō iā Brower ke hele aku a kamaʻilio i nā kānaka e noho ana ma laila. ʻAʻole naʻe ʻo ia i hana pēlā. Akā, inā he makemake ʻiʻo nō kona e hana no ka pono o ia mau kānaka, a laila, he kūpono nō ia poʻo manaʻo e kau aʻela i luna, ʻo ka hāuli o ka mea hewa ʻole, he nalowale koke. Ma ka hana ka ʻike, e ka Lunamakaʻāinana Brower.

Ka Hoʻokūkū Mele A Moʻolelo. ʻAuhea ʻoukou, e nā kānaka haku mele a kākau moʻolelo paha, mai nō a poina i ka Hoʻokūkū Mele A Moʻolelo. He iwakālua kūmāwalu wale nō lā i koe, a pau. He pono ke waiho i ke mele a i ka moʻolelo paha i ka Lā Hoʻihoʻi Ea, ka lā 31 hoʻi o Iulai. No laila, e hoʻokaʻawale paha i manawa e haku ai i mele no kou mea aloha, a e kākau ai paha i moʻolelo, a e waiho aku ma www.hawaiianliterature.com. Aia i laila ka palapala e hoʻopihapiha ai. A he wahi makana nō e lilo ana i ka lanakila o ka māhele haku mele a me ka māhele kākau moʻolelo, he $500.

The weekly Hawaiian language column is coordinated by Kawaihuelani Center for Hawaiian Language at the University of Hawaii.